اج دی رات اخِیر، وے رانجھن – احمد راہی

ڈھاواں مارن گے ہُن بیلے
کھیہہ اُڈاون گے اوہ ویلے
جِنہاں دے اوہلے اِک مِک ہوئی
میری تیری تقدیر، وے رانجھن
اج دی رات اخِیر

جاندِیاں گھڑیاں ڈنگدیاں جاون
اؤندیاں گھڑیاں اُڈدِیاں آون
جاندِیاں اؤندیاں گھڑیاں مِل کے
ڈنگ گھتّی تدبیر، وے رانجھن
اج دی رات اخِیر

آخری وار درد ونڈا لے
ہیر دے پیار نوں ہِکّ نال لا لے
دن چڑھدے تائیں کِھلّر جاسی
ساہواں دی زنجیر، وے رانجھن
اج دی رات اخِیر