نَواں نَواں بُور – احمد راہی
اجے نواں نواں امبیاں نوں بور
اجے ہونٹاں وچ ان چھوئیاں کلیاں دے رس
اجے باہواں وچ سجریاں شاخاں دی ہلور
اجے ان کھڑے پھلاں جیہی ہاسیاں دی دکھ
اجے ٹوراں وچ چڑھدیاں پِینگاں والا زور
اجے ماہیے، ٹپّے ، ڈھولیاں، دے نمّے نمّے رنگ
اَجے دِلاں وچ سدھراں دا ستا ستا شور
اجے ترنجناں چہ ککلیاں گدیاں دے چاء
اجے پیلیاں چہ پیلاں پون سکھے نئیں مور
اجے ساہواں وچ سہیلیاں دے ساہواں دی ہواڑ
اجے سہیلیاں ای چن تے سہیلیاں چکور
اجے کنڈھیاں دے نال نال کھڑیاں نے بیڑیاں
اجے دور بیڑیاں توں چھلاں دور دور
اجے نواں نواں امبیاں نوں بور
