اِک الف پڑھو چھٹکارا اے

اِک الفوں دو تِن چار ہوئے
پِھر لکھ کروڑ ہزار ہوئے
پِھر اوتھوں باہجھ شمار ہوئے
ایس الف دا نکتہ نیارا اے

اِک الف پڑھو چھٹکارا اے

کیوں پڑھنائیں گڈ کتاباں دی
سِر چانائیں پَنڈ عذاباں دی
کیوں ہویائیں شکل جلاداں دی
اَگے پینڈا مشکل بھارا اے

اِک الف پڑھو چھٹکارا اے

بن حافظ حِفظ قرآن کریں
پڑھ پڑھ کے صاف زبان کریں
پر نعمت وچ دھیان کریں
من پِھردا جِیوں ہلکارا اے

اِک الف پڑھو چھٹکارا اے

بلھا بی بوڑھ دا بویا سی
اوہ بِرچھ وڈا جا ہویا سی
جد بِرچھ اوہ فانی ہویا سی
پھر رہ گیا بی اکارا اے

اِک الف پڑھو چُھٹکارا ا ے

مزیدپڑھ