ی یاد کرو جیہڑی گل نوں جی

پورن آکھدا گورو جی آوندی جے

رانی سُندراں مکھ توں لاہ پڑدہ

چرن چم کے سِیس نِواوندی اے

چھیتی بھوجن گُرو دے رکھ اگے

ہتھ بنھ کے عرض سناوندی جے

قادریار اسّیں کھڑے دیکھنے نوں

رانی کیہ انعام لے جاوندی اے

————————–

الف آیا جوگی سبھے ویکھمے نوں

بیٹھے چار چفیروں گھت گھیرا

رانی سندراں مکھ توں لاہ پڑدا

سبھناں ول دیدار دے پھیرا

گرو ناتھ تے پُورن رہے ثابت

ہور ڈولیا سِدّھاں دا سبھ ڈیرہ

قادریار گرو ترسوان ہویا

منگ لے جو رانی جیو تیرا

———————

ب بہت ہے گرو جی دیا تیری

رانی آکھدی کُجھ اٹکا ناہیں

ہیرے لال جواہر سورن موتی

گھر میوندے مال متاع ناہیں

اگے گولیاں باندیاں ٹہلناں نیں

ہور کاسے دی کجھ پرواہ ناہیں

قادریار دیدار نوں اسّیں آئے

ہور منگنے دی دِل چاہ ناہیں

———————

ت ترٹھا ہاں رانیے منگ میتھوں

دُوجی وار کہندا گُرو ایہو ویلا

چارے کوٹ دے باغ بہار میوے

امرت پھل کھائیں رکھیں یاد میلا

رانی سندراں پھیر کے نظر کیتی

پورن بھگت ہے امرت پھل کیلا

قادریار جے تٹھا ہیں بخش مینوں

رانی آکھدی پُورن بھگت چیلا

——————–

ث ثابتی نال کر بَچن بیٹھا

دل کِھسدے گُرو نے ٹوریا اے

پورن چلیا رانی دے ڈھکّ ہو کے

حکم گورو دا اوس نہ موڑیا اے

رانی سندراں دلوں دلیل کر دی

میں تاں ور پایا جیہڑا لوڑیا اے

قادریار میاں پُورن بھگت تائیں

ہن گرو تاں چائی وچھوڑیا اے

———————-

ج جدوں لے سندراں تری پورن

کہندی اج چڑھی چِلے راج دے جی

خوشی وچ نہ میوندی وچ جامے

بند ٹٹ گئے پشواج دے جی

اج ونج وہاجیا میں جیہڑا

ایسا ہور نہ کوئی وِہاجدے جی

قادریار جاں آپنے شہر وڑدی

کم ویکھ غریب نواج دے جی

—————–

ح حال احوال سریر اندر

پورن آپنا آپ پچھانیا اے

جہیناں گلاں توں ربّ جی سنگدا ساں

کیہا رانی نے مینوں رنجانیا اے

اوتھے آکھدا میں دِشا بیٹھ آواں

دلوں سمجھ کے بول وکھانیا اے

قادریار کھڑو کے سُندراں نوں

پورن آکھدا وانگ انجانیاں اے

——————

خ خبر نہ سی رانی سندراں نوں

پُورن دے دغا تُر جاوندا اے

رانی جاندی سی میرے حسن مٹھا

جیہڑا انج عرضاں فرماوندا اے

اوہنوں گولیاں باندِیاں نال دِتیاں

آکھے پھر دِشا پار آوندا اے

قادریار میاں واٹے جاء پورن

ٹِلے بال دا راہ پچھاوندا اے

———————

د دسّیا آ کے گولیاں نے،

پُورن رانیے دھروہ کمائی گیا

اسیں گرو دے واسطے پائی رہیاں

ہتھیں پے کنّی چھڈوائی گیا

رانی سُندراں سن بیتاب ہوئی

سسّی واگ مینوں بِرہوں لائی گیا

قادریار کھلو کے پچھیا سو

دسو گولیو نی کیہڑے راہ گیا

———————–

ذ ذرا طاقت تن وِچ نہ رہی

رانی گاوندی غماں دے گیت لوکو

میں بُھلی ہاں تساں نہ بُھل کوئی

لایو جوگیاں نال پریت لوکو

جنگل گئے نہ بوہڑے سُندراں نوں

جوگی نہیں جے کسے دے مِیت لوکو

قادریار پِچھا کھڑی ویکھدی ساں

خوش وقت وی ہویا بتیت لوکو

————————

ر رنگ محل تے چڑھی رانی

رو آکھدی پُورنا لٹ گیوں

باغ شوق دے پکّ تیار ہوئے

ہتھیں لا کے بوٹیاں پٹ گیوں

گھڑی بیٹھ نہ کیتیاں رج گلاں

جھوٹی پریت لگا کے اٹھ گیوں

قادریار میاں سسّی وانگ مینوں،

تھلاں وچ کُرلاوندی سُٹ گیوں

———————

ز زور ناہیں گولا نال تیرے

کھڑی دست پکاردی دِلجوئی

پورن نظر نہ آوندا سندراں نوں

رانی رنگ محل توں ڈگ موئی

دھپے عشق دے مار حیران کیتی

پاٹے نین نکوں چلی رت سُوہی

قادریار جا لوک حیران ہوئے

اج باز تے چِڑی اسوار ہوئی

—————————–

پورن دا نس جانا

س سندراں دے سواس مُکت ہوئے

پورن نسّ کے گرو دے پاس پنا

گرو آکھیا سی کر قہر آیوں

تیرے کارنے ہویا ہے اج خنا

پورن پرت ڈٹھا گورو خفا دسے،

بھر نین گڑاونے تدے رنّا

قادریار آکھے جاؤ مِلن گولا،

ویکھ ماپیاں نوں پوی ٹھنڈ اوہناں

مزید پڑھو