غ غضب آیا رانی سُندراں نوں

باری کھول جھروکھے دے وچ آنی

کر نظر فقیر دے ول ڈٹّھا

صورتَ ویکھدیاں دِلے نوں سِک دھانی

آکھے گولیے نی ایہنوں سد اندر

کیہی صورت ایہدی میرے من بھانی

قادریار آکھے جوگی آ اندر

رانی سندراں دے من مہربانی

—————————

ف فیر آکھے پورن بھگت اگوں

اندر جان فقیراں دا کرم ناہی

باہر آ کے رانی توں خیر پائیں

اسِیں فقر ہاں تے چھپنا دھرم ناہی

اسّیں آئے ہاں طلب دیدار دی نوں

کوئی ہور ساڈے من بھرم ناہی

قادریار اصیلاں دے اسیں جائے

کوئی جات کجات بے شرم ناہی

——————————-

ق قفل صندوق دا کھول رانی

مروارید لیا کے ڈھیر کردی

ہیرے لال اتے گوہرجواہر موتی

تھال آپ لیاوندی پور زردی

رانی سندراں مکھ توں لاہ پردا

چرن چمّ کے پیر تے سِیس دھردی

قادریارمڑ پھیر وی آویا جے

رجوع رہاں گی ہو غلام بردی

—————————

ک کرم کرو وسّو پاس میرے

کھلی اک میں عرض گزارنی ہاں

اندر چلو تاں رنگ محل تائیں

توشک فرش وچھاء بہاونی ہاں

کراں ٹہل جو تُسّاں دی خوشی ہووے

بھوجن کھاؤ تاں تُرت پکاونی ہاں

قادریار رانی کھڑی عرض کردی

گھڑی رہو تاں جیوکا پاونی ہاں

————————-

ل لیا دیئے بھچھیا کہے پورن

اندر واڑ بناؤ نہ چور سانوں

اگے اک پھاہی وچوں نِکلے ہاں

ہن قضیے پاؤ نہ ہور سانوں

محلاں وچ سہاوندے تسیں راجے

اسّیں جاندڑے بھلے ہاں ٹور سانوں

قادریار پھر بھوجن دی بُھکھ ناہی

سوا پہر دی واٹ نہ موڑ سانوں

————————-

م منتاں کرے نہ رہے پورن

لے کے بھچھیا گُرو دے پاس جائے

ہتھ بنھ کے گرو ناتھ اگے

تحفہ رُوبرُو جا کے رکھدائے

گورو ناتھ تے دیکھ اچرج ہویا

ہیرے لال جواہر نیں کِس پائے

قادریار کہندا رانی سندراں نے

ایہہ خیر تُساں ول اے گھلّیائے

———————-

ن نہیں ایہہ دولتاں کم ساڈے

گُرو آکھدا موڑ لے جاء پُتا

مایہ لوبھ فقیراں دا کم ناہیں

بھوجن بِھکھیا منگ لے آ پتا

فقر جہیی نہ دولت ہور کوئی

سانوں دِتّی ہے آپ الہٰ پتا

قادریار جواہراں روڑ جانو

دنیا خاک ہے اتےہوا پُتا

—————————

و ونجن لگا اگلی بھلک پورن

موتی موڑنے نوں شہر ول اُتے

رانی سُندراں اوس دا راہ تکے

کھڑی دیکھدی رنگ محل اتے

جانی جان فقیراں دا رب والی

پُورن آ پھریا گھڑی پل اُتے

قادریار ایس گل دا گاہک ناہیں

رانی پُوجدی سی جیہڑی گل اُتے

———————————

ہ ہس کے آن سلام کیتا

رانی سندراںنے پورن بھگت تائیں

پورن بھگت الد کے ڈھیر کردا

موتی سانبھ رانی ساڈے کم ناہیں

پکے بھوجن دی بھچھیاپا سانوں

اچھیا ہے تاں ترت پکا لیاہیں

قادریار میرا گُرو خفا ہوندا

لال موتیاں ہیرے نہ چت لائیں

————————

ل لیاوندی ترت پکا رانی

چھتی بھوجن گرم کرائیکے جی

چلی سِریں چکا کے گولیاں دے

آپ نذر لیندی جھولی چائیکے جی

ہتھ بنھ کے آکھدی چل سائیاں

متھا ٹیک آواں میں وی جائیکے جی

قادر یار لے چلیا سُندراں نوں

پورن حسن دی انگلی لائیکے جی

——————————–

رانی دا حال سنانا

الف آکھدے صورت ہے رزق ادّھا

جیکر آپ کسے نوں رب دیوے

صورت وند جے کسے دے ولّ ویکھے

سبھ کوئی بلانودا ہسّ کے وے

مارے صورتاں دے مر گئے عاشق

نہیں حسن دا درد فراق ایویں

قادریار پرواہ کی سوہنیاں نوں

جیہنے حسن دی منگی مراد لیوے

مزید پڑھو