قصہ پورن بھگت : پورن دا جمنا
قصہ پورن بھگت
پورن سیالکوٹ دے راجے سلوان دے پتر دا ناں سی اودھی کہانی قادر یار نے یادگار کر دتی۔قادر یار دیاں بولیاں لمے سمے لئی پنجاب دی لوک بولی دی جان سن۔
پورن دا جمنا
الف آ سکھی سیالکوٹ اندر
پورن پت سلوان دا جایا ای
جدوں جمیاں راجے نوں خبر ہوئی
سد پنڈتاں وید پڑھایا ای
باراں برس نہ راجیا منہ لگیں،
دیکھ پنڈتاں ایہ فرمایا ای
قادر یار میاں پورن بھگت تائیں
باپ جمدیاں ہی بھوہرے پایا ای
——————–
پورن نوں دیس نکالا
ب بید اتے جیویں لکھیا سی
تویں پنڈتاں آکھ سنائی دتا
پورن اک ہنیریوں نکلیا سی
دوجی کوٹھڑی دے وچ پائی دِتا
سنے گولیاں باندیاں داعیاں نوں
باراں برس دا خرچ پوائی دتا
قادریار میاں پورن بھگت تائیں
باپ جمدیاں قید کرائی دِتا
——————————
پورن دی تربیت
ت تابع نال استاد ہوئے
لگے ودیا عقل سکھاؤنے نوں
چھیاں برساں دا پورن بھگت ہویا
پاندھے پوتھیاں وید پڑھاؤنے نوں
تیراندازیاں ہتھ کمان دتی
دسن ترکشاں تیر چلاؤنے نوں
قادر یار جوان جد ہویا پورن
دم دم لوچے باہر آؤنے نوں
باراں ورے لنگ گئے
ث ثابتی ودِیا سکھ رہیا
باراں برس گزرے خبردار ہویا
پورن پتر راجے سلواہن تائیں
پان لے کے ملن تیار ہویا
چڑھی ہرس راجے سلواہن تائیں
چک اڈیاں پبّاں دے بھار ہویا
قادریار پتر کرماں والیاں دے
چڑھی حرص تے مست سنسار ہویا
——————————
راجے دا دوجا ویا
ج جائی راجے سلواہن آندی
اک استری ہور ویاہ کے جی
اوس دی جات چمیاری تے نام لونا
گھر آندی سی این منائی کے جی
صورت اوسدی چند مہتاب وانگوں
جدوں بیٹھی سی زیوراں پائی کے جی
قادریار کیہ آکھ سُناوساں میں
پنچھی ڈگدے سن درشن پائی کے جی
——————————
پورن دی واپسی
ہ ہار شنگار سبھ پہر کے جی
پورن نال مہورتاں باہر آیا
کڈھ بھوہریوں باپ دا بھور تازی
نگاہ رکھ کے وچ بازار آیا
خوشی بہت ہوئی رانی اچھراں نوں
گھریں دین ودھائی سنسار آیا
قادریار میاں باراں برس پِچھوں
پورن راجیاں دے دربار آیا
——————————
خ خوشی ہوئی سلواہن راجے
پورن پت سلام جاں آن کیتا
خوشی نال نہ میوندا وچ جامے
گٔئوآں منسیاں تے پن دان کیتا
پورن وچ کچہری دے آن بیٹھا
لوکاں ساریاں ول دھیان کیتا
قادریار صورت نہ جائے جھلّی
جدوں سائے دے ہیٹھ دیوان کیتا
——————————
پورن دے ویہ دی تیاری
د دسدا پچھدا لاگِیاں نوں
سلواہن راجا تدوں گج کے جی
پورن بھگت دا ڈھونڈساں ساک کوئی
جتھے چل ڈھکاں دن اج دے جی
مینوں سہکدیاں رب نے لال دِتا
اکھیں دیکھ لواں خوشی رج کے جی
قادریار میاں پورن بھگت اگوں
کہندا سخن سچا اک وج کے جی
——————————
پورن دا انکار
ذ ذرا نہ سنگدا باپ کولوں
کہندا بابلا پت ویاہ ناہی
جس واسطے لوک ویاہ کردے
میرے من اجے کوئی چاؤ ناہی
میرا بھور سیلانی نت رہندا
پیرِیں بیڑیاں بابلا پا ناہیں
قادریار آکھے پورن باپ تائیں
میتھوں رب دا ناؤں بھلاؤ ناہی
——————————
ر رنگ تغیّر ہو گیا سن کے
پورن بھگت ولوں سلواہن دا ای
کولوں اٹھ وزیر نے مت دتی
اجے ایہہ کی راجیا جاندا ای
جدوں ہوگ جوان کرگ آپے
تیتھوں باہرا فکر ویاہن دا ای
قادریار وزیر دے لگ آکھے
راجا پھیر خوشی اندر آندا ای
——————————
ز زبان تھیں راجے نے حکم کیتا
گھر جا سلام کر مائیاں نوں
جس واسطے بھورے دے وچ پایا
ہن موڑ نہ خوشیاں آئیاں نوں
ایسے حِرص نوں دھولرے پالیا میں
ہُن موڑ نہ خوشیاں آئیاں نوں
پورن اُٹھیا باپ دا حکم لے کے
اگے لاوندا لاگِیاں نائیاں نوں
قادریار میں صِفت کی کراں اس دی
رناں دیکھ بھلاندیاں سائیاں نوں
——————–
پورن دا کھر آنا
ش شہر آیا گھر مائیاں دے
پُورن پُچھدا نوکراں چاتراں نوں
جس جایا اوس نوں مان وڈا
متھا ٹیکنا مائی ماتراں نوں
رانی لُونا دے محل نوں رواں ہویا
اندر جائی وڑیا پُتر خاطراں نوں
قادریار بہال کے نفر پِچھے،
پوڑی چڑھیا متھا ٹیکن ماتراں نوں
——————–
سوتیلی ماں دا مرمٹنا
ص صفت نہ حسن دی جائے جھلّی
رانی دیکھ کے پُورن نوں ترت مٹھی
صُورت نظر آئی راجا بُھل گیا
سر پیر تائیں اگّ بھڑک اٹھی
دِلوں پُتر نوں یار بنا بیٹھی
اس دی ثابتی دی وچوں لجّ ٹُٹّی
قادریار میاں تریمت ہینسیاری
لگّی آپ وگاونے ندی پٹھی
——————–
ض ضرب تے ضرب دے نال راجا
اندر لنگھ کے رنگ محل جائے
ہتھ بنّھ کے ساہمنے کھڑا ہندا
متھا ٹیکنا ہاں میری دھرم مائے
اگوں دیونا اس پیار سائی
سگوں دیکھ رانی متھے وٹ پائے
قادریار کھلوئی کے ویکھ اکھیں
چڑھیا قہر چرتر جو ورت جائی
——————–
ط طالیاں میریاں گھیر آندا
لونا اک دلیل دے فکر بنھے
میں وی سورگ پراپتی تھیونی ہاں
پورن بھگت جو آکھیا اک منے
لگی دین لنگار اسمان تائیں
اوہدی ثابتی دے وچوں تھمھ بھنّے
قادریار میاں تریمت ہینسیاری
بھنن لون لگی وچ تھال چھنّے
——————–
ظ ظاہرا آکھدی شرم کیہی
مائی مائی نہ راجیا آکھ مینوں
کُکھے رکھ نہ جمیو جائیوں وے
ماتا آکھنا ہیں کیہڑے ساک مینوں
ہوگگ عمر تیری میری اک راجا
کیہا لایا ای درد فراق مینوں
قادریار نہ سنگدی کہے لونا
کر چلیوں مار ہلاک مینوں
——————–
پورن دی رانی نال تکرار
ع عرض کردا شرماء راجا
مائے سخن اولڑے بول ناہی
ماواں پتراں نیونہہ نہ کدے لگا
جگ وِچ مونہہ کالکھا گھول ناہی
سینے نال لگائی کے رکھ مینوں
پتر جان مائی دلوں ڈول ناہی
قادریار میاں دوویں جھگڑدے نی
سائیں باجھ دوجا کوئی کول ناہی
——————–
غ غم نہ جاندی خوف خطرہ
لونا اٹھ کے پکڑدی آن چولا
چل پلنگ اُتّے بیٹھ اک واری
کراں منّت تیری سن عرض گولا
پری جیہی میں استری عرض کراں
توں تے مرد ناہی کوئی ہے بھولا
قادریار نہ سنگدی کہے لُونا
سیج مان میری جِند جان ڈھولا
——————–
ف فیر کہیا غصے ہوئی پورن
تینوں وگ کی گئی ہے بان مائے
جہدی استری توں اوہ ہے باپ میرا
توں بھی شِکم تھیں جمیا جان مائے
گلّاں ایہو جہیاں جدوں ہون گیاں
پُٹھی ہوگُ زمیں اسمان مائے
قادریار میاں پُورن دے متِّیں
کدھر گیا ای اج دھیان مائے
——————–
ق قہر کرا نہ پُورنا وے
آکھے لگ جا جے بھلا چاہنا ایں
جھولی اڈّ میں کھلی ہاں پاس تیرے
ہینسیاریا خیر نہ پاؤنا ایں
کچّھڑ بیٹھ ممّا کدوں چُنگھیا اے
ایویں کُوڑ دی ماؤں بناونا ایں
قادریار نہ سنگدی کہے لُونا
کاہنوں گردنی خون رکھاؤنا ایں
——————–
ک کہے پورن سنی سچ ماتا
تیرے پلنگھ تے پیر نہ مول دھرساں
اکھیں پھیر کے مول نہ نظر کراں
میں تاں سولی تے چڑھن قبول کرساں
کنّی کھچ کے اندروں باہر آیا
کہندا دھرم گوا کے کیہ مرساں
قادریار بلاء کے کہے لونا
تیرے لہو دا پورنا گھٹ بھرساں
مزید پڑھو
