ایہہ میرا گیت – شو کمار بٹالوی
ایہہ میرا گیت
کسے نہ گانا
ایہہ میرا گیت
میں آپے گاکے
بھلکے ہی مر جانا
ایہہ میرا گیت
کسے نہ گانا!
ایہہ میرا گیت دھرت توں میلا
سورج جیڈ پرانا
کوٹ جنم توں پیا اسانوں
اس دا بول ہنڈھانا
ہور کسے دی جا نا کائی
اس نُوں ہوٹھیں لانا
ایہہ تاں میرے نال جمیا
نال بہشتیں جانا
ایہہ میرا گیت
میں آپے گا کے
بھلکے ہی مر جانا
ایس گیت دا عجب جیہا سُر
ڈاڈھا درد رنجانا
کتک ماہ وچ دُور پہاڑیں
کُونجاں دا کُرلانا
نور پاک دے ویلے رکھ وچ
چڑیاں دا چچلانا
کالی راتے سر کڑیاں توں
پوناں دا لنگھ جانا!
ایہہ میرا گیت
میں آپے گا کے
بھلکے ہی مرجانا
میں تے میرے گیت نے دوہاں
جد بھلکے مر جانا
برہوں دے گھر جائیاں سانوں
قبریں لبھن آئیاں
سبھناں سئیاں اک دروازے
مکھوں بول الانا
کسے کسے دے لیکھے ہوندا
ایڈا درد کمانا
ایہہ میرا گیت
کسے نہ گانا
ایہہ میرا گیت
میں آپے گا کے
بھلکے ہی مر جانا
ایہہ میرا گیت
کسے نہ گانا!
مزیدپڑھیں
