پیٹ واسطے باندراں پائی ٹوپی – استاد دامن
پیٹ واسطے باندراں پائی ٹوپی
ہتھ جوڑ سلام گزاردے نیں
پیٹ واسطے حور تے پری زاد
جان جنّ تے بھوت توں واردے نیں
چیر پھاڑ کے بندے نوں کھان جیہڑے
رچھّ نچدے وچ بازار دے نیں
پنچھی جنگل توں تُرے نے شہر ولّے
دنیاں دار پئے چوگ کھلاردے نیں
دولت کسے دی رات نوں جاگ کے تے
چوکیدار پئے ہاکراں ماردے نیں
بھار اِٹاں دا سراں تے چا کے تے
بے گھرے پئے محل اُساردے نیں
استاد دامن دی شاعری
