مرنوں پہلاں مرن -ظل ہما بخاری
جی کردا اے دنیا چھڈ جاں
لا کے پھندا سُولی چڑھ جاں
یا پھیر زہر دی گولی کھا کے
چپ چپیے قبرے پے جاں
رون پھیر سارے باجھوں میرے
قدر تے جانن باجھوں میرے
انج تے کرجاں پر میں سوچاں
مر کے قبروں نوں کیہ کھوجاں
کیوں نہ دھرتی اُتے رہ کے
مرن توں پہلاں دھرتی کھوجاں
مشکل کار دی عادت پا کے
ناں شریفاں وچ لکھا کے
ناں کما کے ناں بنا کے
سچ دی خاطر کجھ تے کر جاں
حق دی خاطر کیوں نہ مر جاں
بعد مرن دے وی میں جیواں
