چیجی منگن بال انجانے
منہ وچ پاندے ویکھ سیانے
ریڈیو اتوں سنو قوالی
اﷲ راکھا پنجتن والی
جدھر ویکھو سگرٹ پان
زندہ باد او پاکستان

چرس افیم دے ٹھیکے کُھلے
پیو کھاؤ لٹو بُلھے
پانی پا دیو اپنے چُلھے
سوں جاؤ لے اتے جُلّے
جگہ جگہ ‘تے چھولے نان
زندہ باد او پاکستان

بُوہے بند مسیتاں دے نے
مُلاں مارے نیتاں دے نے
جھگڑے پئے ہوئے ریتاں دے نے
پاکاں نال پلیتاں دے نے
ڈنگوں ڈنگ ہوئے انسان
زندہ باد او پاکستان

سُنّیاں ولوں ہویا اعلان
وہابی ہو گیا کلّ جہان
کتھے تر گئی اج پچھان
جو بولے سو نہ فرمان
وکھرو وکھری لگے تان
زندہ باد او پاکستان

ساڈے ملک دے نوجوان
بھنگی چرسی تے بھلوان
فیشن ہے ایہناں دی جان
گیت ہجر دے گاؤندے جان
مٹی رولدے اپنی شان
زندہ باد او پاکستان

استاد دامن