وارث شاہ تے حضرت باہو بیٹھے اک مسیتے

شاه حسین تے بلھے شاہ نے پاک پیالے پیتے

ہویا سی رحمان دا چرچا چپے چپے اندر

شاعری نال خوشحال جگاۓ لوگ جیڑے سی ستے

اک پاسے شہباز قلندر دم دم،دم دے اندر

دوجے پاسے شاہ لطیف تے سچل عشق سمندر

ایہناں وچوں کجھ دی عمر عبادت کر دیاں لنگھی

ایہناں وچوں کجھ دی اپنے رب توں ڈردیاں لنگھی

پشلے دور دے کجھ شاعر فن ویچن دے ماہر سن

سودا، غالب، ذوق،اقبال،جییے شاعر سن

اَک٘ے مُک٘ے جھولی چک اوہ سبھ اُتے ظاہر سن

ایہناں وچوں کجھ دی عمر قصیدے لکھدیاں لنگی

ایہناں وچوں کجھ دی عمر وظیفے منگدیاں لنگی

ساڈے دور دا ساڈا اک شاعر سی جالب

شاعر وی او بہادر سی بندہ وی سی نر

جگری یار کساناں دا تے مزدوراں دا جگر

اوہدا اک اک شعر ڈغے وانگ وجیا دل دے اپر

وجدے ڈغا تے کردے لوک دما دم مست قلندر

ساری حیاتی اپنی اوہنے کٹی جیلاں اندر

جاندیاں ہویاں جیل کدی نہیں مڑ کے تکدا سی او گھر

نہ ای اپنے ملکوں دوڑن والا سی او لیڈر

کدی کدار ای جمن ماواں اودے ورگے پتر

سڑ جاندے سن ویری کنی آگ سی اودے اندر

روک نہ سکیا اوہد رستہ کوئی وی فوجی آمر

ساڈے دور دا ساڈا اپنا اک شاعر سی جالب

نہ ای کسے حاکم دا اوہنے کدی قصیدہ لکھیا

نہ ای کدی وی کسے دے کولوں اوہنے وظیفہ منگیا

نہ ای ظالم نو او ظالم آکھن توں کدی اوہ سنگیا

جیڑے پاسے تو وی لنگیا او سر چک کے لنگیا

ساڈے دور دا ساڈا اپنا اک شاعر سی جالب

صابر ظفر